WTA Player of the Year atan Barty

Ashleigh Barty tan kumin chu kum ṭha bik a ni a, hlawhtlinna a chan chu chawimawinain a zui zel. Australian nula hi 2019 chunga hmeichhe tennis player ṭha ber WTA Player of the Year atan thlan a ni.

Kum 23 mi Barty hian French Open nomawi a chawi a, Australian nula zingah Evonne Goolagong Cawley (1976) hnu lamah world number 1 ni leh thei hmasa ber a ni hial bawk. Season liam ta khan match 57-ah hnehna a chang a, WTA hnuaiah nomawi pali a chawi - number 1 ni chungin kum tawp a hmang. Ranking-ah hian amah hnaih bertu Karolina Pliskova aiin point 2000 deuh thawin a sang zawk a ni.

Kum 19 mi chauh ni chunga US Open champion ni thei Bianca Andreescu chu Newcomer of the Year atan thlan a ni a, American player Sofia Kenin (Most Improved Player) leh Switzerland mi Belinda Bencic (Comeback Player) te hnenah chawimawina hlan a ni bawk.