Zenit-ah Jhon Duran a kal

Colombia international striker Jhon Duran chuan club thar a zawm leh ta a, kum khat chuang awrha a club palina ni turin Zenit Saint Petersburg chu Al Nassr aṭangin loan-in a pan.

Kum 22 mi Duran hian January 2025 khan Aston Villa chhuahsanin, Al Nassr hi a zawm a, a man zat hi pound maktaduai 64.5 lai niin, a khelh ṭhat dan a zira san belh thei tura tih a ni.

Al Nassr-ah hian kum nga leh a chanve chhung atan contract a ziak a, match 18-ah goal 12 ngawt a khung. Mahse, Cristiano Ronaldo telna team hian point 13 ngawtin champion team Al Ittihad an phak lo a, Duran hi Fenerbahce lamah loan-in an kaltir zui.

Turkish club-ah erawh Villa striker hlui hi beisei angin a che lo. Match 21 a khelhsakah goal nga chiah a khung a, July 2025-a season khat chhung atana loan-a a zawm team hi chhuahsanin, Russia lam a pan leh ta zawk.

Duran hi Russia club lar Zenit-ah hian season tawp thleng loan-in a khel dawn a, Russian Premier League table-ah pahnihna an ni mek. Mahse, hmahruaitu Krasnodar an phak lohna erawh point khat chauh a ni a, Duran hi a champion zui lo ang tih a sawi theih loh.

Hetihrual hian Zenit hian European football erawh an khel thei chuang lo - Russia-in February 2022-a Ukraine a run aṭang khan UEFA chuan an hnuaia inelnaah Russia leh an club-te inlan an rem ti tawh lo a ni.

Colombia tan match 17 a khelha goal thum khungtu Duran hian an ram club Envigado aṭanga a hming chher ṭanin, MLS club Chicago Fire-ah a kal zui a, January 2023 khan Villa a zawm zui.

Villa tan match 78 khela goal 20 khungin a hming a chher hman viau a, West Ham pawhin lei tumin vawi hnih ngawt an hel hman. Hammers hian kum 2024 nipuiah khan lakluh tumin Villa an dawr a, mahse, an hnar.

Nikum January khan Hammers hian £57mtd-in an dawr nawn a, mahse, hei pawh an hnar leh tho. London club an hnar hnuah Al Nassr dawrna Villa-in an pawm a, mahse, Duran-a beisei ang erawhin thil a kal vek ta bik lo.