AS Roma chakpuitu Malen

Thawhṭanni zan Serie A inkhelah AS Roma chuan 2-0 in Cagliari an hneh a, Roma tan Aston Villa aṭanga an hawh Donyell Malen-a'n goal hnih khungin a team a chakpui.

Roma tan inhliam vangin Paulo Dybala, Artem Dovbyk, Evan Ferguson leh Stephan El Shaarawy te awm lo mah se Dutch forward Malen-a'n an hmun ruak a hnawhkhat hneh hle.

Stadio Olimpico-a inkhelah mualneitu Roma an chungnung zawk a, Cagliari keeper chetsual vangin goal an khung nghal teuh hle. Minute 25-naah Malen a inlar a, Gianluca Mancini ball pek um lutin mawi takin keeper a chip khum a, an hmahruaina goal a khung.

Malen-a'n a duhtawk mai lo a, minute 65-naah Mehmet Zeki Celik-a ball cross chu hnai takin aṭangin Malen bawkin a pet lut a, an hmahruaina a belhchhah. Mikhual team Cagliari-in chhanletna an neih theih loh avangin a tlawm zawkah an ṭang a, mualneitu Roma an chak.

An chak avangin Roma-in point 46 an hmu a, palinaa awm Juventus nen an hmuh zat inang chiahin goal difference-ah an phak loh avangin panganaah an awm a, season tharah Champions League khelh phak an tum hle. Roma tan thu lawmawm dang a awm a, hun rei tak khup hliam vanga a inkhelh theih loh hnuah Paulo Dybala chuan dam lam a pan a, February 15, Pathianni zana Napoli an tlawh hunah a inlan theih a rinawm.