Top four beiseina chhi nungtu Villareal

Thawhṭanni zan La Liga inkhelah Villareal chuan 4-1 in Espanyol an hneh a, Georges Mikautadze, Nicolas Pepe, Alberto Moleiro ten goal khat ṭheuh an khung bakah Jose Salinas-a'n an lamah a tilut a, Espanyol tan Leandro Cabrera goal khung chu scoreline timawitu chauh a ni.

Estadio de la Ceramica, Villareal-a inkhelah mualneituin inkhel thunun thei lo mah se an chance neih chhun an hmang ṭangkai a, goal zawnah vawi thum petin a goal vek a, Jose Salinas-a'n goal khat dang a khilai tel bawk. Hun tawp dawnah Espanyol defender Leandro Cabrera-a'n ti goal ve mah se an si phurh sut zawh nan a tlai tawh a, Villareal an chak tho.

Villareal hian point 45 hmuin palinaah an awm a, an chung chiaha awm Atletico nen an point hmuh zat a inang a, match khatin an khel tlem zawk bawk. Match khelh tur la tam mah se Villareal-in season thara Champions League khel turin beiseina sang tak an nei.

An club President Fernando Roig chuan,"Kan thil tawn mek hi a ropuiin a pawimawh a, Europe-a inelnaah kan let leh theih nan kan vaia kan ṭan tlan a ngai," tiin Europe-ah inlan leh an tum hle.