Lakers tan Thunder an lian

NBA regular season kal mekah nimin zing khan Oklahoma City Thunder chuan 119-110 in Los Angeles Lakers an hneh a, Western Conference-ah hma an hruai chhunzawm zel.

Crypto.com Arena-a inkhelah Shai Gilgeous-Alexander awm lo mah se Thunder-in buaina an tawk lo a, Jalen Williams-a'n point 23 neiin ani aia score hnem an awm lo. Isaiah Joe (19), Alex Caruso (17) leh Cason Wallace (12) te an khel ṭha bawk a, a vawi khat nana All Star-a thlan Chet Holmgren-a'n double double siamin, point 13 score-in rebound vawi 10 a la a, Thunder chak nan a thawhhlawk hle.

Veteran forward LeBron James-a'n Lakers tan double double a siam a, point 22 leh assist 10 a nei. Marcus Smart (19), Austin Reaves (16) leh Jake LaRavia (14) te khel ṭha viau mah se a vanduai zawkah an ṭang a, Thunder hneh nan a tawk lo.

OKC tan hliam avanga an chawlh hnuah Jalen Williams, Alex Caruso, Chet Holmgren leh Luguentz Dort te an lo kir a, MVP ni lai Shai Gilgeous-Alexander la tel thei lo mah se an khelh ṭhat nghal avangin Thunder an inringtawk sawt ang.

Lakers tan Luka Doncic a la inkhel thei lo a, Slovenian point guard Doncic tel loin Lakers-in OKC an ngam lo a, chutihrualin inhliam vang thoin Thunder tan SGA a inlan theih loh avangin Doncic awm lo hi Lakers tan chhuanlam a tling lo. Doncic lo kir hun tur chiang lo mah se an match dawt leha San Antonio Spurs leh Dallas Mavericks an tum hunah a la inlan thei dawn lo.