Netherlands tan De Leede

T20 Cricket World Cup-ah Netherlands-in nimin khan Namibia wicket sarih an hneh a, match hmasa berah Pakistan hneh lo mah se Super 8 beiseina an chhi nung. Arun Jaitley Stadium, Delhi-ah Netherlands hian vawm hmasak an thlang a, Namibia hian 156/8 runs an siam. Flying Dutchmen-in over 18-ah 159/3 runs siamin wicket sarihin hnehna an chang.

Netherlands tan Bas de Leede a che ṭha a, wicket hnih (20/2) a lak bakah thi loin ball 48-ah 72 runs a siam. Kum 26 mi De Leede hi all rounder a ni a, 2023 World Cup-a (ODI) Netherlands an khelh theih nan pawh khan player pawimawh a ni.

Group A-a hian India, Netherlands, Pakistan, Nambia leh United States te an awm a, nizan khan US leh Pakistan te an inkhel a, result kan hre hman lo. Group khat aṭangin team pahnihin Super 8 an lut ang.