Spurs-in Bayern an ngam lo

Nilaini zan Champions League inkhelah last 16 lut chiang tawh Bayern Munich leh Tottenham Hotspur an inkhel a, Jose Mourinho enkawl English club hi 3-1 in an tlawm. 

Group stage-a team pahnih intawn hmasakah 7-2 in Bayern an chak a, an inkhelh hmasaka Spurs boss la ni lo Mourinho tan phuba lak lam aiin player chawlh hahdamtir chu rilruah a lian zawk. Captain Harry Kane chu squad-ah pawh a awm lo a, Son Heung-Min chu bench-ah dah a ni bawk. Bayern hian minute 14-na lekah Kingsley Coman hmangin goal an khung nghal. 

Spurs tan tun season-a a vawi khat nana bul ṭan Ryan Sessegnon chuan chhanglet mah se German champion hian Thomas Muller leh Philippe Coutinho hmangin an khung leh a, 3-1 in an chak. Spurs tana goal khungtu Sessegnon hian nipui transfer lai khan beiseina sang tak nen Fulham aṭangin Spurs a zawm a, mahse kum 19 mi winger hi England Under 21 tana a inlanna lamah a inhliam avangin Bayern hma hian match thumah chiah a inlan. Nilani zanah Mourinho-a'n chance duhawm a pe a, left back-a khel thei bawk Sessegnon hian Portuguese coach rin ngamna chu a thlawn chantir loin a theihna a pholang. 

Bayern tan erawh chanchin lawmawm lo a awm - goal hmahruai khungtu Coman chu minute 27-naah khup hliam vanga lakchhuah a ngai a, Bayern chuan an player chawlh chhung tur hi, "Hun engemaw chen atan," tih bakin an puangzar lo.