Atletico an chak - last 16 an khel dawn

Spanish La Liga-a beisei phak lo Atletico Madrid-in Champions League hmangin thawk lakna hun an insiam a, an mikhual Lokomotiv Moscow chu 2-0 a hnehin last 16 an lut. 

Atletico tan Kieran Trippier chuan penalty chhuih lut lo mah se Joao Felix chuan an penalty vawi hnihna a pet goal a, defender Felipe chuan second half-ah a belhchhah ve leh bawk. Nilaini zana team pahnih intawn hma hian Atletico tan tlang turin chak a ngai a, an beisei ang result pawh an hmu - mahse tling chiang tawh Juventus-in Bayer Leverkusen an hneh bawk avangin Atletico kha chak lo ta pawh ni se an tlang tho ang. 

Juventus hian 2-0 in Bayer Leverkusen an hneh a, Cristiano Ronaldo leh Gonzalo Higuaín te chuan Italian club tan hian goal khat ve ve an khung - round of 16 a lut team te hi European top five league club-te vek an ni a, Champions League-a hetiang a thlen vawi khatna a ni. 

Wanda Metropolitano-ah Moscow club tan chak beisei a harsa a, chutihrual chuan Atletico hi tun hnaia result nei ṭha hleithei lo an nih avangin Russian club tan beisei bo tawp erawh a ni lo. Mahse, top European club danglamna a lang a, inkhel boruak sangah Atletico an talbuai lo. Inkhel an ṭan deuh chauh tihah player manto Felix chuan penalty a hlawh chhuak a, Kieran Trippier-a'n a pet. 

Tottenham Hotspur defender hlui penalty pet hi Lokomotiv goalkeeper Anton Kochenkov chuan ṭha zetin a dansak. Mahse, Atletico-in chak ngei an tum - minute 15 hnuah handball vangin penalty an hmu leh a, Felix chuan goal-a chantir turin harsatna a nei lo. 

Atletico-in goal dang khung tumin an nawr chhunzawm a, Alvaro Morata goal khung chu VAR rawn hnuah offside vangin pawmsak a ni lo bawk. Minute 54-naah Brazilian defender Felipe chuan goal hnihna a khung ta nge nge a, Koke siamsak aṭanga lut a ni. 

July-a pound maktaduai 113-a Atletico pantu Joao Felix-a'n penalty a hlawhchhuah bakah an penalty vawi hnihna chu goal-ah a chantir a, coach Diego Simeone chuan a player hi a fak hle. Argentine coach chuan, "Joao hi a phur em em reng a, êng takin thil a thlir a, a la naupang hle bawk. Kum naupang tak nihlai hi chuan hlauh kan nei tlem a, chu hun chu Felix hian a paltlang mek a ni," a ti. 

Felix chuan, "Ka pa hian eng thil mah hlau lo turin min zirtir ṭhin a, goal khung hi ka nuam tihzawng tak a ni," tiin Atletico tana goal khung zel a inbeisei thu a sawi. Atletico hian season dang ang thoin tlarhnungah harsatna an nei tam lo - mahse Antoine Griezmann an chan hnuah tlarhma lamin goal an khung tam tawk lo a, Felix chungah beiseina a sang zel ang. 

Ronaldo a vul 

Champions League leh Cristiano Ronaldo hming sawi rem a inhmeh chho zel a, goal khung loin Germany an hawsan mai dawn nia a lan hnuah Portuguese forward hian minute 75-naah Juventus goal hmahruai a khung. Kum 34 mi Ronaldo a 'vul' kan tih rualin Portugal captain hian chuai lam a pan ve ta niin a lang a, a goal khung hi tun season Champions League-a goal hnih a khungna chauh a ni - inelna hrang hrangah match 18 khel tawhin goal kua chauh a la khung. 

Hun pek belh minute hnihnaah Gonzalo Higuain chuan a rawn khung ve leh bawk a, Bayer tan chhanletna hun a awm tawh lo - Juventus lakah an tlawm a, Italian club leh Atletico ten last 16 an lut. Higuain hian tun season match 18-a khelhah goal nga chiah a la khung a, player langsar dang Paulo Dybala chuan match 18-ah goal sarih chauh a la khung bawk. Juventus hian nomawi chawi an ngaihtuah tel a nih chuan tlarhma lamin tun aia goal khung an uar a ngai ang.