Pakistan-in US lakah phuba la

T20 World Cup-ah Pakistan-in United States lakah phuba an la a, 32 runs-in an hneh. Thawhlehni zan inkhelah Shaheens-in 190/9 runs an siam a, United States-in 158/8 runs chauhin an chhanglet. Pakistan hian February 15, Pathianni zan dar 7:00-ah an hmelma India an hmachhawn ang.

Kum 2024 khan United States-in Grand Prairie Stadium, Dallas-ah Pakistan hi super over-ah an hneh a, group stage-ah Shaheens an tla. Kuminah erawh chanchin a danglam tawh a, Colombo-ah US lakah an chungnung.

Ṭhumvawra vannei United States-in vawm hmasak an thlang a, Pakistan-in bat hmasain 190/9 runs an siam. Sahibzada Farhan (73), Babar Azam (46) leh Shadab Khan (30) te an che ṭha a, chakpui tham target an siam.

United States target a sang hret a, Shayan Jahangir (49) leh Shubham Ranjane (51) te chet ṭhatin awmzia a awm pha lo. Tun ṭum inelnaah hian US hi batting lamah an che ṭha tawk lo a, India an hmachhawn ṭum pawhin an target 161 chauh a ni chungin 132 runs chauh an siam a ni.