Silly Point : Geopolitical T20

ICC T20 World Cup 2026 chu hnehsawh takin India-in a thleng leh phawt mai a. Ṭhenawm naute han titau viau mah se, an titau ṭap thawm erawhin inelna boruak a hliah tak tak thei lo. Kumin World Cup hi India leh Sri Lanka ten an thleng a, khelmual pawn leh chhungah cricket boruak a rawn chhem nung ṭan hle.

Bangladesh & Pakistan.

India laka Pakistan lungawi lohna hi chu chatuan daih tur thil a nih hmel tawh a, tun hnaiah Bangladesh leh India sorkar inkar a chiri hle. Bangladesh aṭanga India hmar chhak rawn pem lut nasa lutuk venna atan India sorkarin kut a thlak ṭan vang a ni ber.

An huat tawk tur lekin India-in Bangladesh prime minister hlui Sheikh Hasina a lo mikhual bawk. India rama khel tur Bangladesh chuan T20 World Cup khelhna tur Sri Lanka lama sawn an dil a, ICC-in sirah a hnawl sak. India ram zin ai chuan tiin khel loh zai BCB chuan a rel ta zawk a, a chan nasa zawk chu anmahni tho a ni awm e.

Pakistan lam erawhin boycott an tum a, India nena khelh lohte tum mah se last minute-ah an ngaihdan an thlak. World Cup lamah an hmel kan hmu ta thung a, a lawmawm lamah ngai ang. India leh Pakistan inkhel kan en theih phah dawn.

League stage

Kumin inelnaah hian team 20 chu group paliah an inṭhen a, T20 World Cup-ah hian cricket lama langsar lo Italy leh Nepal te an rawn lang nawk. Football lama ram langsar Italy-in Cricket World Cup an khel hi eng emaw zawng takin a ti hlimawm phian.

Chutihrualin thil chiang tak erawh group stage-ah hi chuan inkhel intum tawk lo deuh te pawh a awm nuk hrih dawn. Cricket game ṭhan zel nan erawh a lawmawm lamah ngai zel ang. Group tin aṭangin a sang pahnihin Super 8 an khel ang.

Indo - Pak

Pathianni zan a lo inher leh anga, Sri Lanka khawpui Colombo-a khelmual Premadasha Stadium lamah champion tura rinkai India leh Pakistan inkhelh hun a lo inher chhuak leh dawn. Tun hnai kum 4-5 choah Pakistan hian India hi a chai thei lo riau a, players quality an inthlauh deuh vang te pawh a ni ang.

India captain Suryakumar Yadav-a'n a form an hmu let leh ṭan dawn te pawh a ang a. USA laka inlan lo, hritlang khawsik Jasprit Bumrah a rawn let leh ngei tawh turah ngai ila, Pakistan hian tun hnaiah India laka an record lungchhiatthlak tak hi thaichhe thei tak maw?

Stadium tin pitch kan hmuh chinah erawh batting a nuam tih a hriat a, ICC T20 World Cup-a four leh six hlap festival hmu turah inbeisei phawt ang.