Barca leh Atletico intawng dawn

Zanin dar 1:30-ah Copa del Rey semi final-ah champion lai Barcelona leh Atletico Madrid an inhmachhawn dawn a, team pahnihte inkhel tur hi final atana awhawm tham a ni a, inkhel hmuhnawm a beisei ngam.

Barca tan Pedri, Gavi leh Andreas Christensen te chu inhliam vanga khel lo tur chinag sa na ni a, Raphinha dinhmun a chiang lo bawk. Brazilian forward Raphinha hian tun season inelna hrang hrangah goal 13 a khung tawh a, hliamin a tlakbuak reng avangin vawi 22 chiah a la inkhel thung. Atletico lakah a inlan dawn leh dawn loh a chiang lo.

Raphinha awm dawn lo mah se veteran striker Robert Lewandowski-a'n a ho thei dawn a, Lamine Yamal, Marcus Rashford, leh Ferran Torres te an awm bawk avangin tlarhma lamah Barca tan lungngaihna tur a awm lo.

Hansi Flick-a naute hi La Liga-ah Real Madrid aiin point khat chauhin an sang a, Champions League-ah an la dam bawkin an hmelma Real-in an chetsual hun an chang reng a, player thlan kawngah Flick-a'n a rilru a sen a ngai ang.

Hetihlai hian Atletico-in awlsam taka Barca inhneh tir mai an tum dawn lo a, an match hnuhnung berah real Betis an hneh loh bawk avangin tlawm nawn an duh dawn lo. Atalanta aṭanga an lakluh Ademola Lookman a tlangnel nghal a, Lookman bakah Alexander Sorloth leh French forward Antoine Griezmann te an awm dawn bawk avangin Barca hneh turin an ṭha tawk.