Match hmasa berah Sindhu chak lo

PV Sindhu tan kawl a eng thei rih lo. BWF World Tour Finals khelh laiah champion lai Sindhu hi a group match hmasa berah Akane Yamaguchi hneh loin a tlawm nghal a, semifinal luh a harsa sawt ang.

Nilaini zan inkhelah Sindhu hian bul a ṭan fuh a, game hmasa ber a lak bakah game hnihnaah pawh 11-6 in hma a hruai hman. Mahse, darkar khat leh minute riat an inkhelh hnuah 18-21, 21-18, 21-8 in a chak lo zawkah a ṭang a ni.

Kum 24 mi Sindhu hian tun hma lama vawi 10 a hneh tawh hi hneh leh ngei tura ngaih a ni, amaherawhchu Japanese nula nen hian an intawn hnuhnung vawi thumah a chak lo vek ta zawk.

World number 6 Sindhu hian a group match pahnihna atan nizan khan Chen Yu Fei a hmachhawn leh a, result kan hre hman lo. Chinese nula hi champion tura Sindhu-i'n a rin zinga mi kha a nih avangin a hmabak chu a awlsam lo ang tih a rin theih.