Napoli-in Coppa Italia an mangṭha

Thawhlehni zan khan Napoli chuan Coppa Italia-ah Cesc Fabregas-a enkawl Como an hneh lo a, team pahnihte hun pangngaiah 1-1 in an inhnehtawk a, penalty shootout hmangin chak zawk zawn a ni a, a vanduai zawkah Napoli an ṭang a, semifinal an inpetkai zo lo.

Team pahnihte an inhnehtawk a, Napoli-in chance nei hmasa mah se Como-in goal an thun hmasa zawk - minute 39-naah Napoli defender Mathías Olivera-a'n Como right back Ivan Smolcic a tihtluk avangin penalty a chawi a, Martin Baturina-a'n hmahruaina goal atan a pet lut.

Second half ṭan aṭanga minute khatna lekah Napoli-in goal an khung a, Rasmus Hojlund-a ball pej ṭha tak chu Antonio Vergara-a'n um lutin keeper chauh a hmachhawn hnuah cool takin a pet goal a, Como keeper Jean Butez-a'n a en liam.

Goal khung tumin team pahnihte innawr chhunzawm mah se goal hmaah an vanduai a, goal kan hmuh chhunzawm tawh lo. Penalty shootout-ah Como player ten an pet goal vek a, Napoli tan Stanislav Lobotka-a'n a pet goal loh avangin penalty-ah 8-7 in Como an chak a, semifinal an lut.

Tun hnaiah player inhliam an gnah avangin Napoli an buai a, an result nghawngin Coppa Italia-a an tlak hma hian Champions League aṭangin pet chhuah an lo ni tawh.

Napoli tan Vanja Milinkovic-Savic, David Neres, Scott McTominay, Matteo Politano, Andre Frank Zambo Anguissa, Kevin De Bruyne, Billy Gilmour leh Giovanni Di Lorenzo te chu hliam vangin an la inlan thei lo a, Romelu Lukaku-a'n ngai a la awh thei lo bawk.

Inelna pahnih aṭangin tla tawh mah se Serie A lamah Napoli an che chhe hran lo a, pathumnaah awmin hmahruaitu Inter Milan chu point kua chauhin an phak lo. Antonio Conte naute hi an dam kim hunah a aia sang zawk thleng turin beiseina sang tak an nei ngei ang.