Gerrard-a'n Rangers-ah châm a tum

Rangers coach Steven Gerrard chuan contract thar a ziah hnaih thu a sawi a, Liverpool legend hian a insawi anga contract thar a ziak a nih chuan Scottish club-ah hian kum 2024 thleng a cham ang. 

Gerrard chuan, "He hmunah hian ka hlim em em a, ka tan thutlukna siam harsa a ni lo. Ni 10 vel liam ta khan club chuan contract thar ziak tur hian min dawr a, inbiakna pawh a kaltluang rih viau a ni," a ti. Captain Fantastic tia hriat hlawh Gerrard hian May 2018 khan Scottish Premiership club hi a zawm a, Rangers a zawm tirh hian kum li chhung atan contract a ziak. 

Ibrox-a a season hmasa berah Gerrard hian Scottish Premiership-ah pahnihna a nihpui nghal a, Europa League group stage khel turin a hruai thleng bawk. Season kal laiah pawh Rangers an che chhe lo. League Cup final an lut a, Scottish Premiership-ah pahnihna an ni mek a, Celtic an phak lohna hi point hnih chauh a nih avangin champion turin beiseina a la sang hle.