A hniam ber Atalanta an tlang!

Champions League group match hnuhnung ber khelh a nih hma khan Atalanta chu group C mawngphah luahtu an ni a, match rukna an khelh zawh meuh chuan Italian club hian last 16 an lut daih. Serie A club hian khualmualah Shakhtar Donetsk chu 3-0 in an luhchhuah, Nilaini zan inkhel dangah tlang chiang tawh Manchester City chuan Dinamo Zagreb 4-1 a an hneh ve bawk si avangin Italian club hi City hnung zuiin an tlang.

Season hmasa khan Atalanta hi Serie A-ah pathumna an ni a, a vawi khat nan Champions League an khel. An group match hmasa paliah chuan point khat chiah an hmu, mahse a hmawr an bawk fuh thung; an elpui Dinamo Zagreb leh Shakhtar te an hneh.

Shakhtar lakah hian Timothy Castagne, Mario Pasalic leh Robin Gosens ten goal khat ṭheuh an khung. Shakhtar defender Dodo chu minute 77-naah tharum a thawh avangin hnawhchhuah a ni a, Ukrainian club lamin last 16 lut turin point khat chauh hmuh ngai mah se an mamawh zat point an hlawh chhuak thei lo.

Leicester City chuan 2016-17 season khan UCL an khelhna hmasa berah last 16 an lut a, tunah chuan Atalanta hian Foxes hnung an zui leh ta chiah. Newcastle United (2002-03) ang bawkin group match hmasa pathuma chak lo vek chunga tlang leh thei hmasa ber an ni bawk.

Atalanta coach Gian Piero Gasperini chuan, "Kan ti thei a ni tih rilrua dah chungin khelmualah kan lut a, hun chanve hmasa lam kha chu a harsa khawp mai. Shakhtar pawh khan beisei an la neih avangin chetsual theihna a ni, a tawpah erawh huaisen leh beidawng loa kan beih rah kan seng," tiin a sawi.

Gabriel Jesus-a hattrick leh Phil Foden goal khat hmangin Manchester City chuan Dinamo Zagreb 4-1 in an hneh a, point 14 hmuin group C-ah an chungnung hle; an mahni hnaih bertu Atalanta chuan point sarih chauh an hmu.

Man City striker rinrawl Sergio Aguero awm loh karah Jesus chu tlarhma lama an hmachhuan a ni a, Brazil international hian a club tan inkhel bul a ṭan hnuhnung pangaah goal nga a khung ta. Pathianni zana Arsenal an tlawh hunah pawh player pawimawh a nih chhunzawm ang.

Kum 22 mi Jesus chuan, "Goal khung hi ka hna a ni a, ṭha taka hna ka thawh avangin ka lawm. Thla hmasa mai kha chuan goal khung ka harsat hle, keimah leh team tan a pawi tih pawh ka hria, tunah erawh nuam ti takin ka khel leh ta," a ti.

Pep Guardiola naute hi Premier League-ah pathumna an ni mek a, UCL-ah hian an tlang chian tawh avangin league lam an ngai pawimawh rih. Dinamo Zagreb lakah hian Kevin De Bruyne, Raheem Sterling leh Kyle Walker te chu bench lamah hahchawlhtir an ni a, Gunners an hmachhawn hunah erawh an ṭhat dan berin an khel ang.