Ancelotti thlaktu Gennaro Gattuso

Napoli chuan Carlo Ancelotti an ban hnu lawkah Gennaro Gattuso chu an coach thar atan an lakluh thu an puang a, club president Aurelio De Laurentiis chuan “Welcome Rino” tiin Gattuso lawmluhna thu a sawi.

Champions League-a Genk an hneh aṭanga darkar thum pawh a liam hmain Ancelotti hi ban a ni a, last 16 in pet kai mah se Serie A lamah result an nei ṭha thei lo - season hmasa pahnihna hi pasarihnaah an awm mek. Genk nen an inhmachhawn hma khan inelna hrang hrangah match kua ngawt chak ni hmel hmu loin an kal.

AC Milan manager a nih laiin Ancelotti hian tuna a mah thlaktu Gattuso hi a enkawl ṭhin a, hlawhtlinna pawh an lo chang dun tawh ṭhin. Gattuso hian Milan hi a enkawl ve tawh tho a, mahse UCL an khelh phak loh avangin season hmasa tawp rual khan a hna a bansan.

Kum 41 mi Gattuso chuan, "Hun harsa leh khirhkhan taka kan awmna aṭang hian thawhchhuah a ngai a, a zawna point hmuh theih kan tum tur a ni. Champions League khel phak china awm leh chu kan tum hmasa tur a ni ang," tiin a sawi.

Amah enkawl tawhtu chungchang sawi zuiin Gattuso chuan, "Carlo Ancelotti hi ka tan chuan pa ang mai a ni a, engtik lai pawhin ka kiangah awmin min thlawp reng ṭhin. Ropuina tam tak a chang tawh a, nakinah pawh nomawi lian dang a la chawi leh ang," tiin season riat chhung amah enkawl tawhtu a fak.

Napoli hian Gattuso enkawlna hnuaia an match hmasa ber atan Inrinni zan dar 10:30 hian Parma an lo mikhual dawn, an mikhual tur nen hian point 21 ve ve nei lai an nih avangin an inkhel tur hi a pawimawh nghal ang.