Premier League khel tam ber Milner

13th February, 2026

Brighton & Hove Albion midfielder James Milner chuan Premier League match khel hnem ber record a nih rual ta - Nilaini zan khan Milner hi Brighton tan a inlan a, match 653 inlana record chelhtu Gareth Barry record a nih rual.

Nilaini zanah Brighton hian Villa Park an lenglut a, champion hial sawi ri ngam Aston Villa lakah 1-0 in an tlawm - Villa goal awmchhun hi Brighton midfielder Jack Hinshelwood-a'n an lama a tihluh palh a ni.

Villa khel ṭha lo mah se an chak a, chu aia sawi hlawh zawk erawh Milner-a record siam chu a ni. Kum 40 mi midfielder hian inkhel bul a ṭan lo a, mahse, minute 22-na lekah Carlos Baleba a thlak.

Baleba hian thlak a nih hian yellow card a hmu tawh a, minute a la tam si a, coach Fabian Hürzeler chuan player kim loa an khelh zui mai a hlauhthawn avanga Baleba chu la chhuak a nih thu a sawi.

Hurzeler chuan inkhelh zawhah Milner hi fak zuiin, "Player naupang zawkte tana entawn tlak a ni a, awihawm lo khawpin a inthunun thei a ni. Kar tin, ni tin mai EPL-a khel tlak a la nihzia a pholan theihna chhan hi tihpalh thil thu a ni lo.

"Ani ang player ka thawhpui thei hi ka lawm a, kan squad-a kan nei hi kan vannei hle. Player a nihna anga kan chhawr piah lamah, a nungchang hian nasa takin team a pui a ni," a ti.

English midfielder Milner hian goal hmanga a record siam lawm theihna remchang a nei a, mahse, Villa keeper ṭha Emi Martinez-a'n a dansak.

Milner-a'n harsatna a tawk a nih loh chuan tun season-ah Barry-a record a khum ngei dawn tih a chiang - a minute ang zawng chuan khel tlem zawk mah se, club liana a khelh chhung a rei zawk tih theihnghilh loh a ṭha.

Leeds United aṭanga bul ṭan Milner hian Leeds tan EPL match 48 khelin, Newcastle United (94), Aston Villa (100), Manchester City (147), Liverpool (230) leh Brighton & Hove Albion (33) tan a khel bawk.

City tan Premier League nomawi vawi hnih chawiin, Liverpool tan vawi khat a champion bawk. Reds-ah nomawi chawi theih a chawi kim a, City-ah hian EPL nomawi pahnih bakah FA Cup, League Cup leh FA Community Shield a la bawk.