Liverpool midfielder Endo inhliam

Sunderland an hneh zanah Liverpool-in chanchin lawmawm lo hawn tur an nei tel a, midfielder khel khat tak Wataru Endo chu hliam vangin lakchhuah a ngai.

Reds hian hliam vangin right back pahnih Jeremie Frimpong leh Conor Bradley an chhawr thei lo a, Arne Slot-a'n right back-a a chher chawp ṭhin Dominik Szoboszlai chu Sunderland lakah hrem vangin a inlan thei lo bawk.

Hei vang hian Slot-a'n a chhawr zen zen loh Wataru Endo chu right back-ah a chhawr a, tun season-a a vawi khat nana EPL inkhel bul ṭantu Japanese midfielder hian a khelh pawh a khel ṭha hle.

Mahse, Liverpool-in hma an hruai hnu lawkah Endo hian a kerekah hliam a tuar a, zawnchhuah a ngaih avangin a dinhmun a ṭha lutuk lo tih a chiang - hliam damkawr Joe Gomez chuan a thlak.

Slot chuan, "Eng ang taka na nge a nih hre turin kan nghah phawt a ngai a, mahse, hun rei tak chu a inlan theih loh ka ring," a ti - Endo hian tun season inelna hrang hrangah Reds tan match 12 a khel tawh.