MangṬha basketball legend Kobe Bryant

Basketball player ropui leh ngaihnat hlawh ber zinga mi Kobe Bryant chu January 26, Pathianni zan dar 11:15 (IST) vel khan helicopter chesual avangin a thi. Chetsualnaah hian Bryant-a fanu Gianna (Gigi) leh midang pasarih telin nunna an chan vek. Byrant hian a nupui Vanessa baka a fanu dang pathum Natalia, Bianca leh Capri te a kalsan a ni.

Tunlai khawvelah 'legend' tih ṭawngkam a nazawnga hman  a ni fo a, Bryant erawh tehfung hrang hrang hman pawhin 'basketball legend' tih a inhmeh thlap. Basketball legend thihna hian a chhung te, a ṭhian te leh amah ngaisangtu te a nghawng na a, khawvel hmun hrang hrang aṭangin an ui thu an tarlang nasa hle.

January 26 zing dar 9:06 PT (10:36 pm IST) khan Bryant leh a fanu kum 13 mi Gianna; Orange Coast College baseball coach John Altobelli leh a nupui Keri leh fanu Alyssa; Harbor Day School assistant coach Christina Mauser bakah midang pathum chu John Wayne Airport aṭangin Bryant-a helicopter 'Sikorsky S-76' hmangin an thlawk chhuak.

Pathianni zingah hian ruah a sur bakah chhum a zin nasat avangin LAPD helicopter-te leh boruaka che tla chi dangte chu thlawhchhuahtir an ni lo. Flight tracker aṭanga a lan danin Bryant-te chuanna hi  Los Angeles sahuan chung vela an awm laiin a buai ṭan. 

Zing dar 9:30 velah pilot chuan Burbank Airports control tower a bia a, harsatna an tawh thu a hrilh. Chhum zing a chhah zel avangin chhim lama tlang awmna lam an pan a, helicopter hi feet 1,200 - 2,000 inkar velah 161 knots (298 km/h) vela chakin an thlawk.

Dar 9:45-ah Los Angeles hmar thlang lama awm Calabasas tlangah Byrant-te chuanna helicopter hi a tla a, a alh chhunzawm nghal. Los Angeles County Fire Department-ten dar 10:30-ah an ṭhelh mit thei a, helicopter-a chuang mi pakua zingah dam chhuak an awm lo.

Helicopter chetsual dan hi Federal Aviation Administration, National Transportation Safety Board, FBI leh federal government-a chief aviation regulator pahnihten helicopter chetsual dan hi an chhui chiang ang.

Kobe Bryant hi Los Angeles Lakers tana shooting guard, jersey number 8 leh 24 ha ṭhin a ni. NBA bikah LA Lakers tan chauh a khel a, kum 20 tehmeuh a khelhna Lakers hian amah chawimawi nan player dang hak ve theih loh turin 8 leh 24 te an chawlhtir.

Black Mamba tia hminglem an pek Kobe hian Lakers-a a khelh chhungin NBA championship vawi nga a champion pui a, All-Star team-ah vawi 18 a tel tawh a, All-NBA Team member-ah vawi 11 telin All-Defensive team member-ah vawi kua a tel thei. 

Lakers tan 33,643 points score sakin he team tana point score hnem ber a ni a, NBA pumpuiah pathumna a ni bawk.NBA-a a ropui tluk zetin ram tan pawh a ropui a, FIBA Americas Championship, 2008 Beijing Olympic leh 2012 London Olympic-ah te khan USA a champion pui a ni.

Duhtak Basketball,

Ka pa mawza sei tak bun chunga

Ka ngaihtuahna rama basketball khela

Chakna basket Great Western Forum-a ka score lai khan

Thil pakhat chu a tak ngei a ni tih ka hria;

I zunah ka uai zo a ni tih hi.

Ka hmangaih em che a, ka theihna zawng zawng-

Ka ngaihtuahna leh taksa

Ka rilru leh thlarau ka hlan che a

Mipa naupang kum ruk mi

I zuna uai na tak nichung khan

Ka tan court zau tawk a awm thei lo

Keimah chauh ka inhmu a

Tumah dang ka hmu ngai lo

Tichuan ka tlan zel a

I tan tiin ball tin chan tumin

Court zawng zawng ka tlan chhuak a

Nang chuan ka theihna min ngen a

Mahse ka thinlung ka hlan zawk che a

Ka tan chuan engdang zawng ai khan i hlu miau a

Thlan tui far leh hrehawm karah pawh ka khel zel a

Chu chu chona phurawmin min koh vang a ni lo

Nangman min koh vang zawk a ni.

I tan engkim ka ti a

Ka tan engkim i tih miau avangin

I tana hlimna thleng ṭhinah khan

Kha hlimna kha keipawh min pe ve a.

Mipa naupang kum ruk mi kha a suangtuahna i tihhlawhltin sak a

Kha vang khan ka hmangaih reng fo ang che

Mahse tunah zawng i kianga awm reng ka thei ta lo

Tun season chauh hi pek theih che ka nei ta

Inkhel zel turin ka thinlung a la inpeih a

Court chhunga chetla turin ka rilru hi a la inpeih reng

Mahse ka taksa zawk hian 'mangṭha' ti turin min ti si.

A pawi lo e.

Nang thlah tur che hian ka inpeih e.

Hei hi min hriatsak la ka duh

Nang nena hun tlem tê kan neih hi hlim takin hmang ila

A chhia leh a ṭha

Kan lo inpek tawh zawng kha ngaihlu ila

Chu zawng chu kan neih a ni tawh miau si

Kan pahnihin hei hi kan hria e, engpawh ti ila

Kha naupang kha ka ni reng ang

Mawza sei tak bun chunga

Khelmual sir bawlhhlawh bawma

Second nga chauh awm tawh chunga

Ka kuta ball keng chunga

5 … 4 … 3 … 2 … 1 tia au ṭhin kha.

Ka hmangaih reng ang che,

Kobe