Zanin dar 7:30-ah MPL8 final

Mizoram Premier League Season 8 final chu zanin dar 7:30 hian RG Stadium, Mualpuiah Aizawl FC leh Electric Veng FC ten an khel dawn. 

I League club tan nomawi palina a nih theih laiin Electric Veng tan erawh final hi thil thar a ni a, MPL nomawi hmangin an club kum 25 tlin lawm an tum ang. Aizawl FC ṭantute an sen ang a, Electric Veng ṭantute an pawl dawn. Inkhel en man hi Rs 100 a ni ang a, tualchhung football khawmpui lianah inkhel hmuhnawm tak chhawpchhuah a ni ngei ang.

Aizawl FC hi league round hmahruaitu an ni a, team ṭha ber an ni tih finfiah turin I League khel chau chungin Chanmari FC lakah hnehna an chang. Final hmain AFC-in ni hnih hahdamna hun an nei tawh a, Standly Rosario-a'n MPL nomawi kan duh tih thu hmanga a sawi chu a tak ram chan theih nan an player neih ṭhat ber nen a rawn inlan ang.

Standly kaihhruai Aizawl FC ṭhatna chu inkhel hmuhnawm an pho chhuak ṭhin a, ball an chan tam bakah goal khung tumin an nawr tel ṭhin bawk. AFC tlarhmaah goal 10 khung tawh F. Lalremsanga leh tawnhriat nei ṭha William Lalnunfela te bukin an awm a rinawm a, an khel kawp thei bawk. Player dang 10 erawh a chiang tawk viauah a ngaih theih.

Tlarhma thlawp turin Alfred Kemah Jaryan bakah Paul Ramfangzauva leh K. Lalhmangaihkima te an awm a, winger hmuhnawm pahnih Rochharzela leh Isak Vanlalruatfela te an kawl. Electric Veng tan ven tur bik an awm lo - ven nga ṭhiau an ni!

Tlar hnungah Richard Kassaga a awm chuan ngaih a ngam nghal a, foreign defender thlawptu Lalrosanga, Joe Zoherliana leh Lalramhmunmawia te pawh Mizo defender ṭha vek an ni. Semifinal pahnihah keeper Lalremruata'n bul a ṭan a, Neroca laka inhliam Lalawmpuia aia bul ṭan turin a rinawm zawk.

Electric Vengin final-ah hrem vangin Lalrammawia an chhawr thei dawn lo a, amaherawhchu MPL5-a Chanmari FC champion puitu Lalruatfela Zote an kawl. Coach Lalsangzuala Hmar chuan, "Rammawia an hrem bakah David-a dinhmun a la hriat loh. Chuvangin Fela Zote mawhphurhna a sang a, final-ah hian Electric Veng club a hmangaihna a lantir a ṭul. Club hmangaihna nena kan khelh chuan inkhelh kalhmang a dang daih ang," tiin Vanglaini a hrilh.

Electric Veng hian tlarhnungah Bethlehem Vengthlang trio Lalmuansanga, PC Laldinpuia leh K. Lalmalsawma te an kawl a, mual sira awm Lalnunmawia leh Rorelliana te an rintlak hle. Sanga hoten nomawi an duh chuan goal an chhuah loh a ṭul a, chumi ti thei tur chuan player pawh an nei ṭha.

Goal khung tur zingah sawi hmaih thiang lo Ramhlunchhunga an kawl. Kolasib rawlthar hian hmuhnawm a lantir leh a nih chuan Aizawl FC ṭantute tan hmuh nuam a ni lo ang. Sanga chuan, "Electric Veng mipui tan in lum aṭanga en a thiang lo," tiin RG Stadium-a inkhel en vek turin a sawm.