Sociedad-in Bilbao an hneh

Copa del Rey semifinal khelhah Nilaini zan khan Real Sociedad chuan 1-0 in Athletic Bilbao an hneh a, goal awmchhun hi Sociedad midfielder Benat Turrientes-a khung a ni. Second Leg khelh tur la awm mah se Sociedad tan final lut turin an dinhmun a ṭha.

San Mames Stadium-a inkhelah team pahnihte an inhnehtawk a, goal chance insiam chhawk zak zak mahse goal-ah an vanduai avangin first half-ah goal kan hmu lo. Minute 62-naah Portuguese forward Goncalo Guedes chuan keeper chauh a hmchhawn hnuah Turrientes tan a pe a, Spanish midfielder Turrientes-a'n goal awmchhun ni turin chiang takin a pet goal.

Second Leg hi March-ah khelh leh tur a ni a, Sociedad-in Bilbao an lo mikhual ve thung dawn. Sociedad-in khualmualah hnehna an chang a, an mualah second leg khelh a nih dawn bawk avangin an inringtawk khawp ang.

Real Sociedad hi 2020 khan an champion a, tun hnai season thum chhungin semifinal vawi thum lut mah se final an inpetkai thei lo. First Leg-ah hnehna an chan avangin Sociedad-in inrintawkna sang tak an nei ang. Nizan inkhel dangah Barcelona leh Atletico Madrid te an inhmachhawn a, an result kan hre hman lo. Sociedad hian final-ah Barca leh Atletico inkhela chak zawk an hmachhawn dawn a, a awlsam dawn lo.