Green-a double double a tawk lo

NBA regular season khelh mekah nimin zing khan San Antonio Spurs chuan 126-113 in Golden State Warriors an hneh lo a, Warriors tan Draymond Green chuan double double siam mah se Spurs hneh nan a tawk lo.

Chase Center, San Francisco-a inkhelah De'Aaron Fox a langsar a, Fox hian point 27 score-in a score tam ber a, assist vawi riat a nei bawk. Dan pangngaiin Victor Wembanyama a che ṭha a, Wemby hian point 26 neiin rebound vawi kua a la bawk a, Keldon Johnson (21) leh Dylan Harper (14) te Spurs chak nan an thawhhlawk viau bawk.

Warriors tan center Draymond Green-a'n point 17 neiin rebound vawi 12 a la a, Green-a double double bakah De'Anthony Melton (17), Moses Moody (17) leh Brandin Podziemski (16) te khel chhe lo mah se an vanduai ṭum an tawng a, a tlawm zawkah an ṭang.

Warriors tan an thiampuipa Stephen Curry a la inlan thei lo a, Curry tel lohna Warriors an danglam. American point guard Curry hian January tawp lam khan a khup a tina a, match nga a zawnin a khel tawh lo. Curry hi February 16, Thawhṭanni zinga khelh tur NBA All Star game pawh a khelh a rinawm loh.