PSG-in Enrique thlun ngheh tum

Spanish coach Luis Enrique chu a team enkawl mek PSG chuan contract thar ziahpui an tum a, inbiakna engmah a la awm lo thung. PSG hian an coach hi club dang lakah an chan an hlau a, thlun ngheh an tum hle.

Luis Enrique hian July 2023 khan PSG hi a zawm a, nikum February khan contract ziakin 2027 thleng cham turin an inrem a, tunah kum khat chauh a nei tawh. Spanish coach hian PSG a chet ṭhatpui a, season hmasaah treble champion a nihpui a, tun season-ah pawh a chet chhiatpui hran lo.

Hetihlai hian Manchester United chuan Enrique hi tun season tawpah lakluh an duh nia sawi a awm ve mek bawk a, Man United hi an player hlui Michael Carrick-a'n enkawl mekin enkawltu nghet an nei lo. Carrick-a'n chet ṭhatpui mah se United-in enkawltu thar an melh ve reng a, Carrick a dinhmun a chian bik loh avangin Enrique hming a ri ring hle.

Hetiang thu leng vel karah hian PSG chuan an coach Enrique a chhuah mai an hlau a, 2030 thleng cham tura contract ziahpui an tum. Enrique-a'n contract hi a ziah a, a hmang tluan thei a nih chuan PSG-ah kum sarih chhung a awm dawn tihna a ni a, Europe club lian zingah hetiang chena rei team pakhat enkawl thei zingah a hming a lang ve dawn.

PSG hian zanin dar 11:30-ah Rennes an tlawh dawn a, Enrique leh a naute hi an hnuai chiaha awm Lens nen an inthlauhna point hnih chiah a ni a, hmahruai chunzawm zel an duh a nih chuan an chak ngei a ngai. An tum tur Rennes hi match hnuhnung pathumah an tlawm vek avangin chak loh an duh dawn lo a, PSG tan a awlsam dawn loh avangin theih tawp an chhuah a ngai ang.