Davida leh Goliatha min hriatchhuahtir - Sanga

Electric Veng coach Lalsangzuala Hmar chuan MPL8 final-a Aizawl FC nen an inkhel tur chuan Davida leh Goliatha a hriatt chhuahtir thu Vanglaini a hrilh.

Chanmari leh Chhinga Veng champion pui tawhtu Sanga chuan, "Aizawl FC hi MPL aia league sang zawk I League khel thei an ni a, an coach Standly Rosario pawh sulhnu nei ṭha tak a ni a, foreigner pawh an nei ṭha a, Mizo player-ah pawh a ṭha ber zel an kawl. Keini nena khaikhin rual a ni lo a, kan inthlau hret a ni," tiin a sawi.

Electric Veng coach chuan sawi chhunzawmin, "Kan inkhel tur hian Davida leh Goliatha min hriatchhuahtir a, Davida chak thu pawh ka bengah a ri tel. Inthlau viau mah ila vawi thum kan inkhelh tawhnaah hian vawi khat chiah an chak a, hnehna an chan ṭum hian minute 86-naah goal an khung. Final-ah hian Melthum pa hoin EFC player leh Electric Veng mipuiin kan theihna lantir ve kan tum. Tun hi Electric Veng tan hun ṭha a ni a, bawhpelh a thiang lo," tiin chak ngei a tum thu a sawi.