Thawhṭanniah Champions League draw nei dawn
Europe-a club football inelna sang ber Champions League-ah last 16 khel tur a chiang tawh a, Thawhṭanni hian knockout round-a inhmachhawn tur draw neih a ni dawn.
Team 16 hi pot hnihah ṭhen hran an ni dawn a, pot pakhatah group stage hmahruaitu an awm ang a, pot dangah pahnihna team pariat an awm thung ang. Ram khat club te chu last 16-ah hian an la intum thei dawn lo a, chumi awmzia chu champion lai Liverpool-in Manchester City, Tottenham Hotspur leh Chelsea an hmachhawn thei dawn lo tihna a ni.
Group stage-a awm dun tawh club chu last 16-ah hian an inhmachhawn thei dawn lo bawk. Champions League last 16 first leg hi February 18&19 leh February 25& 26-ah khelh a ni dawn a, March 10& 11 leh March 17&18-ah second leg khelh a ni ang.
May 30-ah Champion League final hi khelh tur a ni dawn a, kum 2005-a Liverpool lo champion tawhna Istanbul khawpui chuan Ataturk Stadium-ah final hi a thleng dawn a ni.
Premier League club-ten an hmachhawn theih club-te
Liverpool: Atalanta, Atletico Madrid, Borussia Dortmund, Lyon, Real Madrid
Manchester City: Atletico Madrid, Borussia Dortmund, Lyon, Napoli, Real Madrid
Chelsea: Barcelona, Bayern Munich, Juventus, RB Leipzig, Paris St-Germain
Tottenham: Barcelona, Juventus, RB Leipzig, Paris St-Germain, Valencia