Zaninah East Bengal inlan dawn

India rama club inelna ngaihhlut I League chu zaninah khelh chhunzawm a ni dawn a, Nilainia Mohun Bagan laka 4-0 a mualpho Trau chuan East Bengal hi an lenchilh dawn. 

Lalthuammawia Ralte, Brandon VL Remdika leh Rohlupuia khelhna East Bengal hian an match hnuhnung berah Manipur club tho Neroca chu 4-1 in an sawp a, Trau hi an zuam ang. East Bengal-ah hian midfielder tawnhriat nei ṭha Lalrindika Ralte chu captain ni mah se hliam vangin a la inlan thei lo a, Pathianni hian a hma hun tichiang turin doctor a hmu leh phawt dawn. 

Pathianni chawhnu dar 2:00-ah Real Kashmir chuan Churchill Brothers an mikhual dawn bawk a, Goan club hian Lalkhaw-puimawia (Mapuia), Lalengzama Vangchhia leh Vanlalduatsanga an kawl. Churchill hian an match hmasa pahnihah hnehna an chang a, 3-0 a Punjab FC an hneh ṭumin Kelkang tlangval Mapuia'n goal hnih a khung.