AZ tan Man United an thiam lua
Second half minute 11 chhunga goal li khung thei Manchester United chuan an mikhual AZ Alkmaar 4-1 in an sawp a, manager Ole Gunnar Solskjaer-a naute hi Europa League group L hmahruaitu nichungin knockout stage an lut.
Ningani zan khan Premier League club dang Arsenal leh Wolverhampton Wanderers te pawhin group stage an paltlang. Gunners hi group F hmahruaitu an ni a, Wolves erawh Sporting Braga aia point khata an hniam avangin group K aṭangin pahnihna nichungin an tlang.
Goal li chu
Old Trafford-a inkhelah hun chanve hmasa lam chu goal a lut lo, second half-ah erawh AZ an ṭang zo lo. Ashley Young (53'), Mason Greenwood (58', 64') leh Juan Mata (62') ten goal khungin an mikhual lakah ṭhat an chhuah lo chiang hle. Goal hnih khungtu Greenwood hi kum 18 leh ni 72 mi chauh a la ni a, Manchester United player zingah Europe football match khata goal hnih khung thei naupang ber niin, season kal laia inelna hrang hrangah goal ruk a khung tawh a ni.
United hian 2016 khan Dutch club tho Feyenoord chu si li faiin an lo hneh tawh a, a hnu lamah European football-a hnehna an chan chian leh ber ṭum a ni. Group hmahruaitu an nih avang hian December 16, Thawhṭannia last 32 draw neih a nih hunah Champions League aṭanga rawn tla Benfica, Ajax leh Inter Milan te an la hmachhawn thei rih lo ang.
Hmabak Everton
Ole Gunnar Solskjaer-a enkawl United hian tun hnai inelna hrang hranga an match hnuhnung pathumah hnehna an chang ta. Pathianni zan dar 7:30 hian Everton nen Premier League an khel zui dawn a, manager nghet nei lo Toffees hi Chelsea hneh hlim an nih avangin zuam sual theih tur an ni ang.
Europa League-ah hian tlang chiang tawh an nih avangin Solskjaer-a'n a player neih ṭhat a khek, Manchester City hnehtu aṭangin Harry Maguire leh Anthony Martial te chiah a chhawr nawn, anni pawh hi second half-ah lak chhuah an ni. Everton lakah chuan an ṭhat dan berin an inrem thung ang.
Everton hi manager lailawk Duncan Ferguson kaihhruaina hnuaiah an la khel thung dawn a, an ban tak Marco Silva hmun ruak luah tur zawng lai Toffees hi tun hnaiah manager hrang hrang nen sawizawm ni mah se bulfuk taka zui an la nei rih lo niin a lang.