Reds nomawi beiseina FA Cup

Premier League champion lai Liverpool-in Arne Slot hoin nomawi an humhim dawn lo tih a hriat theih tawh a, FA Cup leh Champions League-ah champion beiseina an la nei thei ang. Zanin dar 1:30 hian FA Cup fourth round-ah Liverpool-in Brighton & Hove Albion an hmachhawn dawn a, an khingpui hi Premier League club an nih vangin chetsual theihna an ni.

Reds hian kartawp khan Sunderland 1-0 in an hneh a, Wataru Endo zawhchhuah a ngai. Japanese midfielder Endo bakah Alexander Isak (ke), Jeremie Frimpong (malpui), Conor Bradley (khup) leh Giovanni Leoni (khup) te hliam vangin an khel thei dawn lo.

FA Cup a nih avangin Slot-a'n player a siksawi hret a rinawm a, goalkeeper Giorgi Mamardashvili pawh bul ṭan turin a beisei theih ang. Chutihrualin chak an mamawh viau avangin Virgil van Dijk leh Ibrahima Konate bakah tun hnaia che ṭha Florian Wirtz te chu bul ṭan nawn vek tura ngaih an ni.

Mohamed Salah pawhin Brighton lakah record a nei ṭha a, match 19 a hmachhawn tawhah goal 10 a khung bakah assist vawi riat a neih avangin Seagulls lakah inrintawkna a nei dawn. Nikum December thla khan Reds hian Premier League-ah Seagulls hi Hugo Ekitike goal hmangin 2-0 in an hneh tih hriat a ṭha bawk.