Hliam vanga buai Dinpuia

Mizoram Premier League chhul chhuak PC Laldinpuia'n a season nga nan Indian Super League a khel dawn a, mahse, MPL club Bethlehem Vengthlang aṭanga a hming chhertu centre back hi hliam nei chungin tun season-ah a inlan a ṭul dawn.

Dinpuia chuan, "ISL buai avangin training pawh kan nei lawk thei lo a, tunah chuan kar thum vel training pawh kan nei ve leh tawh e. Mahse, kei hi hliam nei chunga chhuk ka nih avangin a buaithlak khawp mai," tiin Vanglaini a hrilh.

Jamshedpur FC aṭanga a ISL zinkawng zawh ṭantu Dinpuia chuan, "Ka kerekah hliam ka nei a, 100% nih loh chuan mahni lam hi fimkhur a awl khawp mai," a ti a, tun season-ah Dinpuia a inlan tam kher lo mai thei - thla thum erh awrh chauh ISL khelh a ni dawn bawk si!

Chhinga Veng tan pawha lo khel tawh Dinpuia hian kum 2021 khan Aizawl FC aṭangin Jamshedpur a zawm a, season thum a khelh hnuah season hmasa khan Chennaiyin a pan a, player pawimawh zinga mi a ni phak.

Tun season-ah beiseina sang tak nena a thlir laiin ISL a buai a, hliam vangin amah bik a buai tel bawk - Chennaiyin-ah hian Dinpuia bakah Laldinliana Renthlei leh Lalrinliana Hnamte (Terina) te an awm a, Mizo player pathum ngawt an kawl.