Rinzuala tan chona thar

Mizo striker neih ṭhat ber zinga mi Lalrinzuala'n tun season-ah a vawi khat nan ISL a khel dawn a, Serchhip tlangvalin ISL-a a season hmasa ber tur a suangtuah lawk dan erawh a ni kher lo ang - Indian football buaina avangin season dang angin ISL a hlu tawk lo.

Aizawl FC striker hlui Rinzuala hian 2023-24 season-ah khan Indian football barakhaihin, I League match 20-ah goal 15 ngawt a khung a, Indian player zinga I League season khata goal khung hnem ber record a siam.

Rinzuala hian Sunil Chhetri leh Mohammed Rafi ten goal 14 ve ve khunga record an lo siam tawh chu a khum a, hetihrual hian Chhetri leh Rafi te record siam lai hun erawh I League top flight league a nih lai a ni thung.

Season hmasa lamah pawh khan Rinzuala hi ISL club hrang hrangin an ngaihven a, Mohun Bagan training phei chu a zawm hman hial. Mahse, khup hliam vanga ISL club zawm nei loin, a club ngai Aizawl FC-ah a kir.

Mizo club tan season hmasa khan hliam damkawr chungin league match 20-ah goal 12 a khung leh ta tho a, ISL club hoin an rim rawn - a tawpah chuan a khelh tam theihna tur ngaihtuahin, NorthEast United a zawm.

June 1, 2025 khan Highlander hian Rinzuala an lakluh thu an puang a, mahse, ISL khelh a nih tak mai loh avangin NorthEast United jersey nen Rinzuala kan hmu lawk lo - ISL-ah hming chher chhunzawm a tum dawn a, a hmuhnawm khawp ang.