Kan khelh dan a professional - Kane

Bayern Munich forward Harry Kane chuan tun hnaiah an khel ṭha a, German Cup-a RB Leipzig laka an khelh dan chu a ṭha a tih thu a sawi.

Bavarians hian Nilaini zan khan DFB-Pokal ah Leipzig 2-0 in an hneh a, Kane leh Luiz Diaz ten goal an khung. English forward Kane chuan,"Quarterfinal chinah chuan eng inelna pawh ni se a boruak a sang tawh a, mahse kan zam lo a, kan zavaiin kan khel ṭha a, semifinal kan lut thei hi a lawmawm ka ti a, kan khelh dan kha a professional hle," a ti.

Tun season-ah England captain Kane hi a khel ṭha a, Bundesliga bikah goal 24 khung tawhin amah hnaih bertu Luis Diaz-a'n goal 13 chauh a la khung. Champions League lamah pawh Kane hoin Bayern an khawng a, Kane hian UCL-ah goal riat khungin Kylian Mbappe chaih a tluk lo a, khawvela striker berte zinga mi a ni mekin treble champion ni thei turin a team a che ṭhatpui hle.

Bayern hian zanin dar 8-ah Werder Bremen an lenchilh dawn a, Vincent Kompany naute hian February 28-ah anmahni hnaih bertu Borussia Dortmund nen an inhmachhawn dawn a, Dortmund nen point ruk chiahin an inthlau a, an intum hmaa an chesual a nih chuan Dortmund lakah pressure an nei dawn.