McTominay dinhmun a chiang lo

Napoli chuan Pathianni zan 1:15-ah Roma an mikhual dawna, midfielder Scott McTominay chu a khup hliam vangin a inlan dawn leh dawn loh a chiang lo.

McTominay hi kar kaltaa Genoa an hneh ṭumin a inhliam a, Thawhlehni zan Coppa Italia-a Como an hneh loh ṭum pawhin a inlan tawh lo. Pathianni zanah a Roma an hmachhawn hunah a inlan theih nan risk an la duh lo niin coach Antonio Conte-a'n a sawi.

Antonio Conte chuan,"A inhliam tirh kha chuan a khelh chhunzawm theih hmel a, mahse a inhliam nat ka hlauh avangin first half tawp dawnah ka la chhuak ta a ni. McTominay hi 100% in fit se ka duh a, a rang thei ang bera a lo let leh ka duh vang a ni," tiin McTominay a lak chhuah chhan a sawi fiah.

Tun hnaiah player inhliam an ngah avangin Napoli an buai a, an result nghawngin Coppa Italia-a an tlak hma hian Champions League aṭangin pet chhuah an lo ni tawh.

Napoli tan Vanja Milinkovic-Savic, David Neres, Matteo Politano, Andre Frank Zambo Anguissa, Kevin De Bruyne, Billy Gilmour leh Giovanni Di Lorenzo te chu hliam vangin an la inlan thei lo a, Romelu Lukaku-a'n ngai a la awh thei lo a, chutiang kara McTominay awm lo hi channa nasa tak a tling.

Inelna pahnih aṭangin tla tawh mah se Serie A lamah Napoli an che chhe hran lo a, pathumnaah awmin hmahruaitu Inter Milan chu point kua chauhin an phak lo. Antonio Conte naute dam kim lo mah se an mualah Roma hneh ngei an tum dawn.