Inter Milan mikhual tur Juventus

Kar tawp Serie A inkhel turah table hmahruaitu Inter Milan chuan zanin dar 1:15-ah Juventus an mikhual dawn a, team pahnihte hi point 12-in an inthlau a, Juve tan champion beiseina a bo tawhah ngaih theih mah se top four an beisei avangin inkhel hmuhnawm a beisei ngam.

Hmanhruaitu Inter hi a zawnin match 12 an chak tawh a, 2026 Serie A bikah an la tlawm lo. Inter tan midfielder Hakan Calhanoglu leh defender Denzel Dumfries te an lo kir leh tawh dawn a, bul an ṭan a rinawm loh thung. Turkish midfielder Calhanoglu hian goal sarih a khung tawh a, midfield-ah an khaipa ber a ni.

Calhanoglu awm loh chhunga a hmun ruak luahtu Piotr Zielinski-a'n bul a ṭan a rinawm thung. Dumfries pawhin bul a ṭan a rinawm loh a, a aia ding Luis Henrique a khel ṭha a, match hnuhnung berah goal a khung.

Tlarhma lamah Lautaro Martinez chu an innghahna a ni leh dawn a, Argentine forward hian tun season Serie A-ah goal 14 a khung tawh a, ani aia khung hnem an awm lo. Martinez thlawp turin Marcus Thuram, Ange-Yoan Bonny leh Pio Esposito te an awm dawn a, tlarhma lamah lungngaihna tur a awm lo.

Inter tan Federico DiMarco a pawimawh leh dawn a, DiMarco hi defender ni mah se tlarhma lam a pui ṭha tel a, assist vawi 11 nei tawhin Inter chak nan a thawhhlawk berte zinga mi a ni. Cristian Chivu nauten chak an duh a nih chuan DiMarco a chet ṭhat a ngai.

Juventus-i'n hmatawngte hliamin a tibuai a, Dusan Vlahovic leh Arkadiusz Milik te chu hliam vanga khel lo tur chiang sa an ni. Khup hliam vanga chawl Francisco Conceicao a lo kir leh tawh dawn a, Portuguese forawrd hi Jonathan David nen an in kawp a rinawm.

Tlarhma thlawp turin Kenan Yildiz a awm dawn bawk a, Turkish midfielder Yildiz hian goal riat a khung tawh a, a ni bakah tun hnaia che ṭha tak Weston McKennie a awm dawn bawk avangin Inter hneh turin Luciano Spalletti naute an ṭha tawk.