Tlarhnung pawp hmaah Tlarhma hriam

Premier League season kal laia goal khung hnem ber Manchester City chu Pathianni zan dar 10:00 hian Emirates Stadium-ah an lenglut dawn a, mikhual thleng tur Arsenal hi a sang zual 10 zinga goal chhuah hnem ber an ni thung.

Manager lailawk Freddie Ljungberg-a naute hi palina nih phak tum an ni a, pathumna ni lai Pep Guardiola naute hi an chak lo leh a nih chuan hmahruaitu Liverpool umphak a harsa ve tawh khawp ang; a tawi zawnga sawiin point mamawh team pahnih an ni.

Ningani zan khan Arsenal hian Europa League-ah Standard Liege 2-2 in an inhnehtawkpui a, group hmahruaitu ni chungin last 32 an lut; goal hnih an chhuah hmasak hnuah an sut leh hram a ni. Premier League match 16 aṭanga goal 24 chhuah club hi an buaina langsar ber chu an tlarhnung pawp hi a ni. Unai Emery-a'n a rem phui thei lo a, manager lailawk Ljungberg pawhin a la chingfel thei chuang lo.

Hector Bellerin dinhmun a chiang lo a, hliam vangin Kieran Tierney a khel thei dawn lo. Ljungberg-a'n David Luiz leh Shkodran Mustafi te a ring zo lo tih a hriat tawh. Man City lakah hian West Ham an hneh ṭum ang khan tlarhnung laiah Sokratis Papastathopoulos leh Calum Chambers te an inkawp a rinawm.

Sergio Aguero a chawl mek a, Argentine striker hi a dinhmun a la chiang lo. Man City tlarhma luahtu chu Gabriel Jesus a ni. Brazil international hian October leh November thla khan minute 700 chuang zet club leh ram tan goal a khung lo.

Jesus hian inkhel bul a ṭan vawi ngaah goal nga a khung leh tawh a, Champions League-a hattrick siam hlim a nih bawk avangin Gunners tlarhnung tan a tawrhhlelhawm khawp ang. Kum 22 mi Jesus chuan, "Thla hmasa vel kha chuan hun ṭha ka neih pawhin ka hlah zel, player dang chu ka sawi thei lo, kei chu goal ka khung loh leh point kan hloh avang khan hrehawm ka ti takzet. Tunah chuan kawng dik kan zawh leh tawh, hun harsa kha a liam," tiin a sawi.