Odisha mawina Jerry Mawia

Indian Super League-ah Jerry Mawihmingthanga a mawi leh ta a, Chanmari tlangval hi Ningani zan khan Winning Pass of the Match, Emerging Player of the Match leh Hero of the Match chawimawina pek vek a ni!

Jerry Mawia khelhna Odisha hian 3-2 in Hyderabad FC chu an hneh a, minute 64-naah Vinit Rai chu hnawhchhuah ni mah se first half-a goal hnih an lo khung tawh chu an vanneihpui. Odisha hian minute 41 chhungin Carlos Delgado leh Xisco Hernandez hmangin 2-0 in hma an hruai a, Vinit hnawhchhuah vanga penalty chu Hyderabad tan Bobo chuan goal-ah chantirin beiseina thar an nei. 

Mahse, Hyderabad an phur tak tak hmain Martin Guedes chuan goal-a rawn khung ve leh a, mikhual team tana Rohit Kumar goal khungin awmzia a nei lo. Odisha tan Jerry-a'n bul a ṭan laiin Daniel Lalhlimpuia chu bench aṭanga luhtir a ni a, Hyderabad lamah Laldanmawia Ralte chuan bench lamah hun a hmang tluan thung.