Aizawl East I an champion

Mizoram State Games 2019 chu nimin tlai khan Lammualah a ṭiak a, Aizawl East I an champion. Mizoram pum huam infiamna inkhawmpui hi December 9-13 inkar khan neih a ni a, Mizoram governor PS Sreedharan Pillai chu khuallian a ni.

State Games overall champion Aizawl East I hian gold medal 25, silver medal 18 leh bronze medal 16 an la a, an medal lak zawng zawng hi medal 59 a ni. Mizoram State Games 2019-ah hian infiammi 7447 an tel a, sports discipline 32 a awm a, event 221 awmin inkhelhna hmun (venue) 24 a awm.

Aizawl East I-in overall champion tur hian gold 25 an la. East I hian Judo-ah medal pasarih an la a, Kick boxing leh Fencing-ah medal panga ve ve an la. Gold Medal an lakna dang chu Tug of War (2) bakah Archery, Boxing, Cricket, Weight Lifting, Wushu leh Muaythai-ah medal pakhat ṭheuh an la bawk. 

2-na leh 3-na

Aizawl West I-in gold 21 an la a, pahnihnaah an awm. Medal lak tam hrim hrimah erawh pathumna East II-in medal an la tam zawk a, amaherawhchu West I hian gold medal an la tam zawk. West I hian medal 49 lain silver medal 10 leh bronze medal 18 an la tel. East II hian gold medal 17 lain silver medal 11 leh bronze medal 23 an la a, an medal lak zawng zawng hi medal 51 a ni.

Mipa : Lalsangliana, Aizawl South I (Gold 5)

Mizo palian inchai champion Lalsangliana chuan gold medal panga a la. Aizawl South I aiawha tel Sangliana hi Wrestling - Mizo Inchai (80Kg Above), Power Lifting (Below 120Kg), Indigenous Games - Insaihruipawh (Above 75Kg), Wrestling Free Style (65Kg Above) leh Indigenous Games - Inbuan (Above 75Kg) ah te elpha an awm lo.

Hmeichhia : Elisian Medai (Lunglei North) (Gold - 3, Silver 1)

Lunglei North aiawha tel Elisian Medai chuan 100m race, High Jump leh Long Jump-ah te gold medal a la vek a, 200m race-ah silver medal a dawng bawk.