Man City-in Salford hneh hram

FA Cup fourth round-ah Manchester City-in Salford City 2-0 in an hneh a, Inrinni zan inkhelah hian Salford defender Alfie Dorrington-a'n an lama a khung bakah substitute Marc Guehi-a'n a khung bawk. Pep Guardiola hoten League Two club Salford hmachhawn mah se nuam sain an chak lo.

City hian hnehna an chan avangin an mual Etihad Stadium-ah FA Cup bikah a zawnin vawi 17 hnehna an chang tawh a, an muala chak loh hnuhnun ber chu kum 2015 kha niin, fourth round-ah Championship club Middlesbrough lakah a chak lo.

An chak zawnna kawngah hian City hian goal 77 an khung a, vawi 11 lai an cleansheet a, inelna hnuhnung pathumah final lutin vawi khat an champion bawk. Heti tak hian record nei ṭha mah se Salford lakah erawh chak an harsat.

Man City boss Pep Guardiola chuan, "Salford khan goal an venghim ṭha em em a, keini lamin hmun ruak kan hmang ṭangkai lo. Goal hnihna kan khung hma kha chuan inkhel a nung tawk lo a ni," tiin an khelh ṭhat tawk loh thu a sawi a, goal hnihna hi minute 81-naah a khung chauh.

Goal khungtu Guehi-a'n Manchester City tana a goal hmasa ber a khung a, English defender hian Pep-a hnuaiah hmun pawimawh a chang chho dawn niin a lang. Premier League lamah Man City-in February 21, Inrinni zan dar 1:30 hian Newcastle United an hmachhawn ang.

City hneh Salford City hi kum 2014 khan Manchester United player hlui Nicky Butt, Ryan Giggs, Gary Neville, Phil Neville, leh Paul Scholes bakah Singaporean sumdawng Peter Lim ten neitu nihna an nei a; tunah hian Project 92 Limited kaihhruaina hnuaiah club hi enkawl a ni.