22nd National MTB C'ship-ah Rinsanga'n bronze la

Mens Junior XCO (Cross Country Olympic) intlansiakah Pangbalkawn tlangval Lalrinsanga'n brone medal a hlawh chhuak. National Championship-ah Sanga hi Mizo zinga medal hmasa ber a ni a, 22nd National MTB Championship hi February 12-15 inkar khan Lower Dibang Valley (LDV) district, Arunachal Pradesh-ah neih a ni.

XCO-ah hian tlankawng khawkrawk leh chhuk chho tak, 4.4km a thui vawi nga an hel chhuak a, tel tura hming pe 42 zinga 38 an intlansiak a, heng zingah hian Sanga hi a thleng hmasa pathumna a ni. Mens Junior intlansiak zawh rual hian Mens U23 an intlansiak chhunzawm a, Mizoram aiawhin Tuirial tlangval Vanlalruata a tlan. Mens Junior te intlansiakna kawngah tho hian intlansiakin lap 5 an tlan a, mi 46 an tel. Tuirial tlangval Vanlalruata hi a pumpuiah parukna a ni thung.

Downhill-a Mizoram aiawh Alan R Romawia leh Vanlalngaihawma te pawhin seeding run nei turin an inbuatsaih mêk bawk. Nimin khan Downhill race tlan a ni a, RedBull Tlangruama parukna Alana leh Samsona te an tlan a, result kan hre hman lo. Mizoram hi manager Lalbiakdika'n a ho a ni.