ISL khelh ṭan a ni ta

India rama top flight league, Indian Super League chu Inrinni khan khelh ṭan a ni ta a, match hmasa berah Mohun Bagan chuan hnehna an chang nghal - Kolkata club hian an mikhual Kerala Blasters chu 2-0 in an hneh.

Bagan-in pawisa an ngah a, ISL a buai chungin player langsar an kawl ho pawh an chhuahtir ve lo - Inrinni zan inkhelah pawh Australian striker Jamie Maclaren leh English defender Tom Aldred ten goal khat ve ve an khung a, Blasters-in a chhanletna tur an nei lo.

Mohun Bagan Lalengmawia Ralte (Apuia) chuan inkhel bul a ṭan a, Kerala Blasters-in Freddy Lallawmawma kawl mah se, bench lamah hun a hmang tluan thung.

Inrinni inkhel hnuhnung zawkah ISL kai thar Inter Kashi-in point an hlawh chhuak a, FC Goa nen 1-1 in an inhnehtawk. Mikhual Inter Kashi hian first half hun pek belhah Prasanth Karuthadathkuni hmangin goal hmahruai an khung a, Goan club-in a chhanletna tur an nei lo reng.

Mahse, minute 80-naah Inter Kashi goalkeeper Lluis Tarres chuan Muhammed Nemil titluin penalty a chawi a, red card a hmu bawk - Goan club tan Dejan Drazic chuan penalty hi goal-ah a chantir a, 1-1 in an ṭin.

Goa tan Ayush Chhetri chu inkhel bul ṭantu zingah a tel a, Mizoram player dang inlan an awm lo thung.