Pedro Neto 3; Chelsea 1; Hull City 0

Chelsea-in FA Cup fifth round an lut a, Pedro Neto chuan hattrick a siam - Blues hian Zirtawpni zan khan Hull City chu 4-0 in an sawp a, Pedro-a'n goal thum a khung bakah, Estevao Willian chuan goal khat a thawh belh.

Blues coach Liam Rosenior hi Hull-ah a mikhual lo hle - player leh coach angin he team-ah hian a lo tel tawh. Player a nih laiin Premier League leh Championship-ah season ruk chhung Hull tan khelin, match 161 a khelhsak hman.

English coach hian inkhelh a chawlhsan hnuah pawh November 2022 - May 2024 inkar kha Hull hi a lo enkawl tawh a, mahse, amah chher hriamtu club khelmuala a kir lehna inkhelah zahngaihna a lantir lo.

Blues hian inkhel ṭantir aṭangin Chelsea an nawr nghal a, mahse, goal erawh an khung lawk bik lo. London club tan Alejandro Garnacho chuan chance nei hmasa berin, Hull keeper Dillon Phillips chuan ṭha zetin a dansak - a per lehlam chu Neto chuan pet zui mah se, John Egan-a'n a lo dang.

Kum 18 mi Estevao pawhin keeper Phillips a tlan hel hnuah, goal ruakah a khung lo - Phillips hi a hnuah a chesual teuh hle. A ball petchhuah tum chu Liam Delap-a'n nangchingin a dang per. A per lehlam hian crossbar a per hnuah goal line-ah tak a sawt a, Delap-a'n pet leh mah se, Phillips hian a tibuai hman.

Mahse, Chelsea an vanduai reng bik lo. Minute 40-naah Blues player-ten ball an inpek kual hnuah Neto chuan a hmawr bawkin, box pawn hret aṭangin goal kilah a khung a, 1-0 a ni.

Minute 51-naah Hull beisei loh dan takin thil a thleng zui. Neto-a corner pet chu tumahin tawk fuh loin, Hull keeper Dillon Phillips-a kap karah a lut a, 2-0 a ni der!

Hetah hian a la tawp lo cheu - goal ruaka khung lotu Estevao Willian chuan a hmingchhe tur thup nan an goal thumna a khung a, 3-0 a nih tak avangin chak tur a chiang tawh.

Mahse, Neto a inthlahdah phah lo. Portuguese forward hian minute 71-naah a goal thumna leh Chelsea goal lina a khung a, a professional career-a Neto-a'n hattrick a siam hmasak ber a ni nghal.

Rosenior-a enkawlna hnuaia Hull-a lo khel tawh, striker Delap-a'n goal khung lo mah se, assist vawi thum a nei a, assist hattrick a siam ve tho tihna a ni.

Chelsea-in an league match hnuhnung berah Leeds United chu 2-2 in an inhnehtawkpui a, Zirtawpni zan FA Cup-a result ṭha tak an hlawh chhuak hian club boruak duhawm lo a beng dai ang.