PSG an tawlhthlu

French club lian Paris Saint Germain an tawlhthlu a, Zirtawpni zan khan an mikhualna ramah 3-1 in Rennes an hneh lo a, an hnuai chiaha awm RC Lens-in hnehna an chan avangin pahnihnaah an tla.

Roazhon Park, Rennes-a inkhelah mualneitu team tan Musa Al Taamari-a'n minute 34-naah hmahruaina goal a khung a, Esteban Lepaul-a'n minute 69-naah an hmahruaina a belhchhah ve bawk.

PSG tan an thiampuipa Ousame Dembele-a'n minute 71-naah an si phurh a sut ṭhen a, PSG-in comeback beiseina nei hman mah se minute 10 hnu lawkah Breel Embolo-a'n an chak nemnghehna goal a khung a, khualmualah PSG an tlawm.

Inkhelh banah PSG goal khungtu Dembele leh coach Luis Enrique inkarah buaina tenau a awm a, Dembele hian a teammate te chu 'mahni hmasial' tiin dressing room lamah a sawi a, hei hi Enrique chuan a ngaithei lo hle.

Spanish coach Enrique chuan,"Kei ka ni emaw, Sporting Director emaw President pawh ni se, tumah club aia lian zawk anga an inngaih ka remti lo. Season hmasaa kan khelh ṭhat chhan chu club tan kan khelh vang a ni a, mimal aiin club kan dah hmasak a, kan ngaih pawimawh zel a ngai," a ti a, Dembele lakah a lawm lo.