Bayern chakna Kane-a record

Inrinni zan khan Bayern Munich chuan 3-0 in Werder Bremen an hneh a, Harry Kane-a'n goal hnih a khung a, a career-a goal 500 a khung tlinna chiah niin mel lung pawimawh a phun. Kane bakah season tawpa chhuak tur Leon Goretzka-a'n goal khat a khung ve bawk.

Weser Stadium, Bremen-a inkhelah dan pangngaiin Bayern an chungnung zawk a, minute 22-naah rawlthar duhawm Lennart Karl-a penalty hlawhchhuah chu Kane-a'n an hmahruaina goal atan a khung a, a duhtawk mai lo - minute thum hnu lawkah box pawn aṭangin mawi takin a pet goal a, a career-a goal 500 a khung tlinna chiah a ni. Minute 70-naah Leon Goretzka-a'n an chak nemnghehna goal a khung a, nuamsa takin Bayern an chak.

Inkhelh zawha hming langsar ber chu Harry Kane a ni a, English forward hian a career-ah goal 500 a khung tlin vang a ni a, Goal 500 khung tling tur hian match 743 a mamawh. Kane hian tun season inelna hrang hrangah Bayern tan goal 41 a khung tawh a, Bundesliga-ah bikah goal 26 khung tawhin ani aia khung hnem an awm lo.

Kum 32 mi Kane hian Bavarians a zawm hmain Tottenham Hotspur, loan-a a khelh kualna Millwall, Leyton Orient leh Leicester City bakah an ram England tan goal 374 a khung a, Bayern tan goal 126 khungin goal 500 a khung tling ta chiah. Kane hma hian footbala chanchina goal 500 khung tling thei 26 an lo awm tawh a, Kane hi 27-na chiah a ni.

La inkhel mek zingah Cristiano Ronaldo (962), Lionel Messi (896), Robert Lewandowski (690), Luis Suarez (600) leh Karim Benzema (517) te chiah a tluk lo.

Bayern hian February 21, Inrinniah Frankfurt an mikhual dawn a, Vincent Kompany naute hi Champions League-ah last 16 an luh chian tawh avangin February-ah UCL match khelh tur an nei lo a, Bundesliga lamah an insawrbing thei ang.