Lal hliam an hlauhawm dawn - Mourinho

Zaninah Champions League knockout playoff first leg khelh a ni dawn a, zanin dar 1:30 hian Benfica-in group match hnuhnung bera an hneh Real Madrid an mikhual dawn.

Benfica hian playoff an luh theih nan Real hi 4-2 in an hneh a, injury time-a goalkeeper Anatoliy Trubin goal khung zarah goal difference hmangin an lut hram.

Portuguese manager Jose Mourinho chuan, "Hliam an tuar a, lal hliam chu an hlauhawm. Champions League lal laka kan thil tih kan hria a, chuvangin first leg-ah huaisen leh inringtawk taka kan khelh a ṭul," tiin a sawi.

Los Blancos hian Benfica laka point an hmuh zawh loh avangin pakuana an ni a, last 16 lut pha loin playoff an khelh a ngaih phah. Spanish club lian hian Xabi Alonso an ban tawh a, Alvaro Arbeloa hnuaia Benfica an hneh lo nawn a nih chuan mualphona a ni ang.