Jamshedpur chak nghal

Pathianni Zan ISL inkhelah Jamshedpur an chak a, Men of Steel hian tun season-a an league match hmasa berah Mohammedan SC chu 1-0 in an hneh - Madih Talal chuan inkhela goal awmchhun a khung.

Jamshedpur tan East Bengal aṭanga an lakluh Mark Zothanpuia chuan inkhel bul a ṭan a, bench aṭangin rawlthar beiseiawm C. Lalhriatpuia a lut ve bawk.

ISL club zinga Mizo player kawl hnem ber Mohammedan SC tan Lalthankima (Thathana) leh Lalremsanga Fanai ten inkhel bul an ṭan a, bench aṭangin Lungdai tlangval Lalngaihsaka a lut thung.

Kolkata club-ah hian Mizo pariat awmin, Joe Zoherliana, Zodingliana Tochhawng, Joseph Lalmuanawma, Jeremy Laldinpuia, Lalngaihsaka, Lalremsanga Fanai, Rochharzela leh Lalthankima te an awm.

Nizan ISL-ah East Bengal leh NorthEast United inkhelin, an result kan hre hman lo - zaninah ISL inkhel a awm dawn lo a, February 19, Ningani zanah match a awm leh chauh ang.