Neymar a dam leh tawh

Brazilian forward Neymar chuan an ram team tana khelh a phu tih a pholang leh ta a, a hliam zai a nih hnua a match hmasa berah assist a nei lehnghal - nimin khan AE Velo Clube chu 6-0 in an sawp.

Nimin zing khan, Sao Paulo state league Campeonato Paulista inkhelah, second half-ah bench aṭangin Neymar hi luhtir a ni a, minute 78-naah Velo Clube defender Islan chuan tlu chungin a lo tlawh - mahse, Neymar a hliam na lo hlauh.

Brazil captain hlui hian a hnu lawkah Gabriel Barbosa goal khung tur a siamsak a, a dam leh ta tih khelmualah a pholang.

Kum 34 mi ni ve tawh Neymar hian January 2025 khan Saudi Pro League club Al Hilal chhuahsanin, a bul ṭanna Santos-ah a kir a, mahse, malpui hliam vangin a hun tam zawka talbuai.

Nikum tawp lamah pawh khup hliam vangin a buai a, mahse, a khup hliam hi zai lawk duh loa inkhel luiin, Brazilian Serie A aṭanga relegate thei dinhmuna ding hman Santos a chhanhim.

Neymar hian Santos a kir hnuah inelna hrang hrangah match 29 khelin goal 11 a khungsak a, assist vawi nga a nei tel - a hliam neih dan nena ngaihtuah chuan a tichhe lo hle.

December 22 khan a khup hliam a zai zui a, a inenkawl reng hnuah nimin inkhel hi a lo kir lehna hmasa ber a ni - Gabriel Barbosa (2 goals), Moisés, Thaciano, Gabriel Menino leh Benjamín Rollheiser goal hmangin an chak.

Santos head coach Juan Pablo Vojvoda chuan Neymar chu World Cup-a Brazil tana inlan tura a la ṭhat tawk thu sawiin, "Neymar hi chu kan mamawh tlang vek a ni ber mai. Santos-in kan mamawh a, national team pawh hian an mamawh a ni.

"A khelh ṭhat chuan Ancelotti pawh a hlim ang tih ka hria a, ani hi chu world class player a ni. Hlawhtlin duhin a la tuihal reng a, match tinah, training tinah chu chu ka la hmu reng a, chu chuan a nawr kal reng a ni," a ti.

Neymar hian Brazil tan match 128 khelin goal 79 a khung a, ram tana goal khung hnem ber a ni. Mahse, October 2023 khan Uruguay laka 2-0 a an tlawm ṭumin khup hliam a nei a, hemi hnu hian ram tan koh a ni leh tawh lo.

Brazil coach Carlo Ancelotti chuan World Cup khel tura a inpeih phawt chuan Neymar koh a hnial loh thu a sawi - Neymar pawhin World Cup 2026 khelh a duh a, a pawimawh berah chuan a chet ṭhat zel a ni.

Neymar hian January khan December 2026 thlenga khel turin Santos-ah hian contract thar a ziak bawk a, chet ṭhat chhunzawm a tum dawn - Brazil hi World Cup-ah group C-ah awmin, Morocco, Haiti leh Scotland te nen an awm ho.