Penalty hmangin Leeds vannei

Birmingham City khelmualah Leeds United an chak a, an chak dan erawh penalty hmangin a ni thung - Championship club hi FA Cup aṭangin an pet chhuak a, kum li chhunga a vawi thum nan Leeds-in FA Cup fifth round an inpetkai.

Mikhual Leeds hian Lukas Nmecha hmangin minute 49-naah goal hmahruai an khung a, chak mai tawh tura an inngaih laiin, minute 89-naah Birmingham tan Patrick Roberts chuan si phurh sutna goal a khung.

Leeds tana Nmecha goal khung hi offside niin lang mah se, FA Cup-ah fifth round hma chu VAR hman a nih loh avangin an pawm - a tawpah erawh Roberts-a'n si phurh a sut leh ta tho.

Extra time-ah pawh team pahnihin goal an khung belh lo a, penalty pet zui a ni. Leeds tana pettu paliin an chhuih goal vek laiin, Leeds goalkeeper Lucas Perri chuan Tommy Doyle-a pet a dansak a, si phurh suttu Patrick Roberts chuan a thlawh over bawk.

A tawpah penalty hmangin, 4-2 in Leeds an chak a, Inrinni zanah league match khel turin Aston Villa an lenchilh zui ang.