Diak karah Wolves chak

Premier League-a lawmna tur nei lo Wolverhampton Wanderers-in FA Cup-ah result lawmawm an nei a, fifth round lut turin Grimsby Town chu 1-0 in an hneh - Santiago Bueno chuan inkhela goal awmchhun a khung.

League Two club Grimsby khelmual Blundell Park-ah ruah a sur nasa a, khelmual a diak hle - khelmual diak taka inkhelh Wolves-in an harsat a, target-a shot an neih awmchhun chu goal-ah chantirin, an chak!

English fourth division club Grimsby Town hi League Cup second round aṭanga Manchester United an petchhuah avang khan ngaihven an hlawh a, mahse, League Cup ang thoin FA Cup-a an zinkawng chu fourth round-ah a tawp.

League Cup fourth round-ah khan Brentford chu 5-0 in an ngam lo a, League Cup fourth round-ah Wolves chu 1-0 in an ngam lo leh ta bawk.

Wolves hian Premier League table mawngphah an luah mek a, match 26 khelh tawhah vawi khat chiah an la chak avangin, thil mak danglam a thleng a nih loh chuan an tlak ngei a rinawm.

Hetiang boruak kara FA Cup lama result lawmawm an nei hi fans tan chuan a lawmawm khawp ang - Nilaini zan dar 1:30-ah EPL khel turin Arsenal an mikhual zui ang.