Napoli leh Roma inhnehtawk

Pathianni zan Serie A inkhelah Napoli leh AS Roma te inkhelah chak zawk an awm lo a 2-2 in an inhnehtawk. Roma tan Donyell Malen-a'n goal hnih a khung a, Napoli-in Leonardo Spinazzola leh Alisson Santos te hmangin an sut.

Diego Armando Maradona Stadium-a inkhelah mikhual team Roma an hlauhawm nghal a, minute sarihna lekah Bryan Zaragoza cross chu Malen-a'n an hmahruaina goal atan a khung a, Napoli an hawihai. Gli Azzurri defender ten Malen an veng ṭha tawk lo bawk.

Goal an chhuah hnuah Napoli an insiamṭha a, minute 40-naah Spinazzola-a'n box pawn aṭangin a club hlui lakah goal a khung a, an siphur a sut. Spinazzola ball pet hi Roma midfielder Niccolò Pisilli-a'n a dan pial avangin keeper Mile Svilar tan dan ngaihna a awm lo.

Second half-ah mualneitu Napoli an chungnung zawk a, goal chance an ngah zawk. Napoli-in inkhel thunun mah se goal an chhuah leh hmasa zawk a, minute 71-naah Amir Rrahman-a'n Roma full back Wesley França a tihtluk nem thluk avangin penalty an chawi.

Penalty pet turin Malen bawk a rawn pen chhuak a, Dutch forward Malen-a'n goal a chantir turin harsatna a nei lo a, a team hma a hruai nawnpui. Aston Villa aṭanga an hawh Malen hian Roma a zawm hnuah match nga khelin goal nga a khung tawh a, a che ṭha tluang hle.

Roma an chak mai dawna a lan laiin Napoli-in goal an khung a, minute 82-naah Sporting Lisbon aṭanga an hawh Alisson Santos-a'n goal ṭha tak khungin an siphur a sut. Hun a tawp zui avangin team pahnihte point khatah an lungawi a ṭul.

An inhnehtawk avangin Napoli chu point 50 hmuin pathumnaah an awm chhunzawm a, an chung chiaha awm AC Milan aia match khata khel tam zawk chungin point hmuin an pha lo. Antonio Conte nauten player inhliam an ngah avangin tun hnaiah result duhawm an nei khat hle.

Roma erawh Napoli lehpelh theihna hun ṭha an bawhpelh a, point 47 hmuin palinaah an awm chhunzawm. Roma hi an hnuai chiaha awm Juventus aiin point khat chiahin an sang a, Juventus-in Inter an hneh loh avangin an dinhmun a danglam lo.