Atletico an hlim rei lo

Barcelona lakah goal li khungin hlim viau mah se, Atletico Madrid hlim chhung a rei lo. Ni thum em pawh a ral hmain an chak lo lehnghal a, khualmualah Rayo Vallecano 3-0 in an hneh lo.

Pathianni zan inkhelah mualneitu Rayo Vallecano an khel ṭha a, Atletico player-ten an ngam meuh lo. Mualneitu team tan Fran Perez-a'n minute 40-naah hmahruaina goal a khung a, minute nga hnu lawkah Oscar Valentin-a'n khung ve lehin an hmahruaina a belhchhah.

Second half-ah Atletico-in ball chang tam zawk a, chance hlauhawm erawh an insiam thei lo. Minute 76-naah Nobel Mendy-a'n an goal thumna a khung leh a, Atletico-in chhanletna neih theih loh avangin a tlawm zawkah an ṭang. Match hmasa lama goal khungtu Julian Alvarez leh Ademola Lookman te an bo a, an inkhel en chuan Barcelona sawptu an ni tih rin a har hle.

Inkhelh banah coach Diego Simeone chuan, "Kan theihna zawng zawng kan hlan a, mahse a chungnung zawkah kan ṭan theih loh avangin kan chak lo a, kan khelh danah sawiselna tur a awm lo. match chhinchhiah tlak a ni lo, kan khingpuite an khel ṭha zawk a chuvanga chak lo kan ni. Tunah chuan Nilaini atan kan insawrbing ang," tiin Nilaini zana UCL playoff-a Club Brugge an hmachhawn tur a thlir lawk.

Atletico hi an chak loh avangin point 45 hmuin palinaah an tla a, anni aia match khata khel tlem zawk Villarreal-in an lehpel. Villarreal nen an point hmuh zat inang mah se goal difference ah an phak loh avangin Atletico hi palinaah an tla. Diego Simeone naute hian hmahruai mektu Real Madrid chu point 15-in an phak lo a, match khelh tur la tam mah se an tan champion beiseina a bo tawhah a ngaih theih.