Bayern-in Diomande an duh

Bayern Munich chuan an elpui RB Leipzig winger Yan Diomande an duh a, 2030 daih contract la nei mah se tun nipui laiin lak an tum dawn niin journalist rintlak Fabrizio Romano-a'n a sawi.

Tun season-ah Bayern an che ṭha a, inelna hrang hrang an hmawchhawnnah la dam vekin treble champion nih theihna chance an nei. Hetihlai hian Bavarians hian Luis Diaz thachhangdawltu tur an melh ve reng a, Diomande hian an mit a la ta ber.

Kum 19 mi Diomande hian tun season Bundesliga-ah goal 11 a khung tawh a, AFCON-ah an ram Ivory Coast tan inlanin, champion pui lo mah se match thum khelin goal khat a khung. A kum ngaihtuahin Diomande a che bawn a, hei vang hian Leipzig hian a manah euro maktaduai 100 aia tlem an pawm dawn lo nia sawi a awm.

Premier League club Liverpool pawhin Diomande hi an duh a, Reds hian Bayern-a Luis Diaz an hralh hnuah amah thlak zo an nei leh lo a, Mohamed Salah chan thei dinhmuna an din bawk avangin Diomande hi Anfield-ah seng luh an duh a, Arne Slot-a lak tum zingah Anthony Gordon nen an hming a ri ring ber a, inbiakna erawh a la awm lo.

Hetihlai hian amah Diomande berin club chhuahsan chu a rilruah a awm loh thu a sawi a, Diomande chuan, "Coaching staff te thusawi ngaithlain ka theih tawp ka chhuah mek a, midang pawhin ka hlim tih an hmu thei ang, tunah chuan season tawp thleng a rim taka thawh hi ka tum ber a ni," a ti.